Maiorga Ramirez EH Bilduko parlamentariak Nafarroako Gobernuari Artzapezpikutzarekin sinatutako hitzarmenari buruz galdetu dio. Hitzarmen horren arabera, Elizak 13 etxebizitza uzten ditu NASUVINSAk alokairuan alokatu ahal izateko.
Horren harira, Foru Gobernuak ohar bat egin zuen titular honekin: “Nafarroako Gobernuak eta Artzapezpikutzak hitzarmen berria zinpetu dute, Elizak bere jabetzako etxebizitzak lagatzeko alokairu publikoan erabiltzeko”. Titular horiek ikusita, foru parlamentariak galdetzen zuen: “Elizak uko egin al dio eta uko egingo al dio alokairuak kobratzeari?”
Foru parlamentariak kritikatu duenez, “titularrak irakurrita, badirudi elizak erabiltzen ez dituen etxebizitza batzuk behar dituzten familien zerbitzura uzten dituela. Hori ez da horrela. Hitzarmenaren indarraldiko urte guztiengatik Elizak 545.000 euro jasoko ditu lagapenagatik”.
Parlamentariak adierazi duenez, “albiste ona da 13 etxebizitza alokairu politika sozialaren zerbitzura jartzea”, baina “Nafarroako Gobernuaren gehiegikeria komunikatiboak” salatu ditu. “Elizak aurpegia garbitu nahi badu, has dadila bidegabe immatrikulatu dena itzultzen”.
