• Atzera bota ditu jazarpen eta difamazio kanpaina baten baitan Eusko Alkartasunaren zuzendaritzaren aurka egin zituzten salaketa guztiak.
• Irmoa den autoaren aurka ezin da errekurtsorik aurkeztu.
Arabako Probintzia Auzitegiko 2. Sekzioko auto batek berretsi du ez zela egoera zibilik usurpatu, agiri-faltsutzerik edo sekreturik errebelatu Eba Blanco Eusko Alkartasuneko Idazkari Nagusiaren lantaldeko diren kide garrantzitsuen kudeaketan. Beraz, Iker Ruiz de Egino, Mariano Álava, Hugo Uruñuela eta Maider Carrere erantzukizun penaletik behin betiko libratzen ditu, denek zuzen jokatu zutela alderdiaren barruko erantzukizunetan beste behin ere argi utziz.
Auzitegiak, bigarren aldiz, ezetsi egin ditu Maiorga Ramírezen sektoreko kideek Gasteizko Instrukzioko 3. Epaitegiaren abenduaren 20ko autoaren aurka aurkeztutako apelazio-errekurtsoan azaldutako argudio guztiak.
Eusko Alkartasunako zuzendaritzak positibotzat jo du inolako deliturik egon ez zela berresten duen autoa, eta bide batez bere kudeaketa balioetsi du, “batzuen haserrerako, eta argi dagoenean ez digutela lan egiten uzten”, Ramírezen sektoreari erreferentzia eginez.
Ildo horretatik, berriro salatu dute sektore horren jazarpen- eta eraiste-kanpaina antidemokratikoa. “Lasai samar geunden, jakin bagenekien ez genuela inolako deliturik egin, baina nazkagarria da mota guztietako difamazioei, profesionalei zein pertsonalei, etengabe aurre egin behar izatea. Politikan ere denak ez du balio. Eusko Alkartasunaren boterea nahi badute, kongresuetan aurkeztu daitezela eta bozkekin irabazi, baina ez funtsik gabeko salaketekin”, azaldu dute.
“Edozer gauza egiten dute alderdia lehertzeko, baina Eusko Alkartasuna eta gure langileen profesionaltasuna defendatzen jarraituko dugu, beharrezkoa den toki guztietan eta edonoren aurrean. Epaitegietan dena salatu ordez, behingoz lanean hastera eta proiektu politikoari ekarpenak egitera gonbidatzen ditugu,”, amaitu dute.
