Industria politika eta kalitatezko enplegua funtsezko elementuak dira Bizkaia lurralde indartsu eta aurreratua izan dadin lortzeko, esan du Iker Rahonak gaur Batzar Nagusietan egin den Kontrolerako Osoko Bilkuran. Horregatik, industria politikak “lidergo politikoa, sailen arteko koordinazioa eta ikuspegi estrategikoa” izan behar duela azaldu du.
EAko Bizkaiko koordinatzaile eta EH Bilduko batzarkidearen ustez, Petronorren adibidea herrialdean dagoen eredu industrialari buruz hitz egiteko eredua da. Bere ustez, Aldundiari eskatu behar zaio “behatzaile izateari uzteko eta konponbidean lagunduko duen aktorea bihurtzea”.
Enplegu Planaren aurkezpenean, enplegua sustatzeko esparru ekonomikoak bilatzeko beharraz hitz egin zuen Aldundiak, “horiek zeintzuk diren zehaztu gabe. Argi dagoena da industria funtsezkoa dela balio erantsia, soldata handiagoak eta baliabide fiskal handiagoak sortzen dituelako”.
Horregatik, eta kaltetutako familia asko daudelako ere, garrantzitsua da Petronorren gertatzen ari dena, “baita Bizkaian geratzen den erreferente industrial bakarrenetakoa delako”.
EH Bilduren ustez politika industrialak honako ezaugarriak izan behar ditu: “osagai teknologiko handia eta lurralde eta ekoizpen-dibertsifikatua izatea; ingurunea errespetatzea; energia gutxiago kontsumitzea; sozialki eta zerga mailan arduratsua izatea; berdintasuna bultzatzea, eta parte hartzearen bidez garatzea”.
